இரா பாவேந்தன் பதிவுகள்

Sunday, November 13, 2011

தஞ்சை மாவட்ட நீர்ப்பாசனம்... (2) திராவிடர் பெருந்தகை டி.எம். நாயர்

Thursday, November 10, 2011

தஞ்சை மாவட்ட நீர்ப்பாசனம்... திராவிடர் பெருந்தகை டி.எம். நாயர்

தொகுப்பாளர்: திராவிடர் இயக்க ஆய்வாளர் அருணாஅரசுகோ பாவேந்தன்

(அன்றைய சென்னை மாகாணத் தில் திராவிடர் இயக்கத்தின் தாய்க் கழகமான தென்னிந்திய நல உரிமைச் சங்கம் என்ற அமைப்பை 1916ஆம் ஆண்டு தோற்றுவித்த முன்னோடிகளில் ஒருவர் டி.எம். நாயர் (1868 _ 1919). பாலக்காடு மாவட்டம் திரூரில் பிறந்த தாரவாத் மாதவன் நாயர் தந்தை பெரியாரால் திராவிட லெனின் என போற்றப் பட்டவர். பொது வாழ்க்கையில் 1904ஆம் ஆண்டு அடியெடுத்து வைத்த டி.எம். நாயர் சென்னை மாநகராட்சி உறுப்பினராக நீண்ட காலம் பணியாற்றியவர். காலனிய அரசு உருவாக்கிய தொழிற்சாலை களுக்கான தொழி லாளர் ஆணையத்தின் முக்கிய உறுப் பினராகச் செயல்பட்டவர். சென்னை மாகாண சட்டமன்ற உறுப்பினராக 1912-_1916 கால கட்டத்தில் பணியாற்றிய போது தஞ்சை மாவட்ட நீர்ப்பாசனம்பற்றி பட்டுக் கோட்டையில் நடந்த தஞ்சாவூர் ஜில்லா மாநாட்டில் ஆற்றிய உரையின் பகுதிகளை சென்னை யிலிருந்து வெளிவந்த பிழைக்கும் வழி மாத இதழ் நவம்பர் (1912) டிசம்பர் (1912) இதழ்களில் வெளியிட்டுள்ளது. டி.எம். நாயரின் வாழ்க்கை வரலாற்றெழுதுதலுக்கு உதவும் இந்த அரிய ஆவணம் முதன்முறையாக மறுவெளியீடு செய்யப்படுகின்றது.)
தஞ்சாவூர் ஜில்லா கான்ஃபரென்ஸ்

நாளது நவம்பர் மாதம் 22 ஆம் தேதியன்று பட்டுக் கோட்டையில் தஞ்சாவூர் ஜில்லா கான்ஃபரென்ஸ் நடந்தது. அப்பொழுது சென்னையில் பிரபல வைத்யரும், முனிஸிபல் கமிஷ னரும், இப்போது சென்னை லெஜிஸ் லேடிவ் கௌன்ஸில் மெம்பராய் எலெக்ஷன் செய்யப் பெற்றவருமான டாக்டர் டி.எம்.நாயர் அக்ராஸனம் வகித்து, தஞ்சாவூர் ஜில்லா நீர்ப் பாசனத்தைப் பற்றியும், அந்த ஜில்லா விலிருந்து கூலிகள் அந்ய தேசங் களுக்குப் போவதைப் பற்றியும், டிப்பைப் பற்றியும், ஸ்தல சுய ஆட்சியைப் பற்றி யும் பேசினார். அதன் பிறகு கான்ப ரென்ஸில் பல தீர்மானங்கள் செய்யப் பட்டன.

டாக்டர் நாயர் நீர்ப் பாச னத்தைப் பற்றிப் பேசியதையும் கான்ப ரென்ஸில் நடந்த தீர்மானங்களைப் பற்றியும் இந்த ஸஞ்சிகையில் யெழுதி யிருக்கிறோம். டாக்டர் நாயர் பேசிய மற்ற விஷயங்களைப் பற்றி அடுத்த ஸஞ்சிகையில் விவரிப்போம்.

தஞ்சாவூர் ஜில்லாவில் அநேக புத்திமான்கள் இருப்பது போலவே ராஜதானியிலுள்ள மற்ற ஜில்லாக்களை உத்தேசித்து தஞ்சாவூர் ஜில்லா நிலத் தின் வளப்பமும் ச்லாக்யமாயிருக்கிறது. ஆனால் நிலம் விளைவதும் விவஸாயம் கடைத்தேறுவதும் மழையையும் காவேரியில் வரும் ஜலத்தையும் பொறுத்திருக்கிறது.

ஆப்ரிக்காவில் இஜிப்ட் என்பதாக ஒரு தேசம் இருக்கிறது. அதில் நைல் என்பதாக ஒரு பெரிய நதி ஓடுகிறது. லார்ட் ரோஸ்பரி என்பவர் ஒரு ஸமயம் இஜிப்ட் தேசத்தைப் பற்றி பேசியபோது இஜிப்ட் தேசமே நைல் நதியாகும், நைல் நதியே இஜிப்ட் தேசமாகும் என்றார். அப்படியே நாமும் தஞ்சாவூரே காவேரி நதியாகும், காவேரி நதியே தஞ்சாவூர் ஜில்லாவாகும் என்று சொல்வதும் ஸரியாகும்.

காவேரியில் சலாக்யமான வண்டல் வருவதால் நாளது வரையில் தஞ்சாவூர் ஜில்லாவுக்கு தென்னிந் தியாவின் தோட்டம் என்று கௌரவம் இருந்து வருகிறது. இந்தக் காவேரி இல்லாவிட்டால் தஞ்சையின் நிலைமை மிகவும் குறைவு அடைந்திருக்கும். இந்த விஷயம் வெகுகாலமாகத் தெரிந்ததே. இதை உத்தேசித்து ஹிந்து ராஜாக்கள் வெகுகாலத்துக்கு முன்னாலேயே காவேரியிலிருந்து பாசனத்துக்கான வேலைகள் ஏற்பாடு செய்ய ஆரம் பித்தார்கள். இங்கிலீஷ் ஈஸ்ட் இந்தியா கம்பெனி ஏற்படுவதற்கு முன்னாலேயே இவை ஆரம்பிக்கப்பட்டன.

அநேக ஆறுகளிலுள்ள ஜலத்தைத் தேக்கி பக்கத்தில் உள்ள நிலங்களுக்குப் பாய்ச்சுவதற்குக் கட்டிய பழைய கட்டிடங்கள் இன்னும் அநேகம் இருக்கின்றன.

அவைகளால் தஞ்சாவூர் அரசர்கள் நீர்ப்பாசன விஷயமாய் எவ்வளவு சிரத்தை எடுத்துக் கொண்டி ருந்தார்கள் என்பது தெரிகிறது. க்ராண்ட் அணைக்கட்டு என்று சொல் லப்படும் கல்லணையுங் கூட வெகு காலத்துக்கு முன்னால் கட்டப்பட்டதே.

சில வருஷங்களுக்கு முன்னால் சில மாறுதல்கள் மாத்திரம் செய்யப்பட்டு தூக்கு ஷட்டர்கள் போட்டிருக் கிறார்கள். உண்மையில், 1836 ஆம் வருஷத்தில் ஸர் ஆர்தர் காட்டன் என்பவர் அப்பர் அணைக்கட்டு என்று சொல்லப்படும் மேல் அணைக்கட்டு கட்டின வரையில், தஞ்சாவூரார்கள் ஹிந்து அரசர்கள் செய்த பாசன ஏற்பாட்டின் பலனையே அடைந்து வந்தார்கள்.

1801 ஆம் வருஷத்தில் ப்ரிட்டிஷார் தஞ்சாவூரை தமது வசம் அடைந்ததற்கு முன் மாத்திரம் தேசமானது குழப்பமான நிலைமையில் இருந்ததால் காவேரி நீராரம்பங்களின் பாசனம் மிகவும் கெடுதலாயிருந்தது.

கம்பெனியார் தஞ்சாவூரைக் கைவசப் படுத்திக் கொண்டவுடனே காவேரி நீராரம்பங்களின் பாசனத்தை வ்ருத்தி செய்வதற்கு வேண்டிய ப்ரயத்னங்கள் செய்யப்பட்டன.

ஆரம்பத்தில் காவேரியில் உள்ள அதிக மணலை அப்புறப் படுத்துவதிலேயே வெகுவாய் ப்ரயத்னங்கள் செய்யப் பட்டன. ஆனால் அந்த முயற்சிகளால் அதிக பலன் ஒன்றும் உண்டாகவில்லை. கொள்ளி டத்தில் தலைப்பில் அப்பர் அணைக் கட்டுக் கட்டினபிறகுதான் காவேரிக்கு நன்றாய் ஜலம் வரலாயிற்று.

இப்படி மேல் அணைக்கட்டு கட்டினதால் கொள்ளிடத்திலிருந்து பிரியும் வாய்க்கால்களுக்கு ஜலம் குறைந்து போயிற்று. அதனால் வரும் ஜலநஷ்டத்துக்கு ஈடு செய்ய லோயர் அணைக்கட்டு என்று சொல்லப்படும் கீழ் அணைக்கட்டு ஒன்று 70 மையி லுக்கு அப்பால் கட்ட வேண்டியதா யிற்று.

அதன் பிறகு 1887_-1889 ஆம் வருஷத்தில் கல்லணையில் காவேரி, வெண்ணாறு, ஹெட் ரெகுலேடர்கள் கட்டவே, காவேரி, வெண்ணாறு இந்த இரண்டு நதிகளிலும் ஜலம் போவதை ஒழுங்குபடுத்துவது ரொம்ப ஸுலப மாயிற்று.

பிற்பாடு செய்த சீர்திருத் தங்கள் எல்லாம் வெள்ள காலத்தில் ஜலத்தை சீர்படுத்தவும் ஜலத்தை ஸரிவர வாய்க்கால்களில் பாய்ச்சவுமே செய்யப்பட்டவை. இவைகளால் காவேரி பாசன ஏற்பாட்டுக்கும் இந்தி யாவிலுள்ள மற்ற பாசன ஏற்பாடுகளுக் கும் ரொம்ப வித்யாஸமிருக்கிறது.

(தொடரும்) (நன்றி.விடுதலை மலர் 05.11.2011

Friday, May 27, 2011

எட்டயபுரத்தில் பண்டைய காலஆவணங்கள் கட்டடம் எரிந்து சாம்பல்

எட்டயபுரம் சமஸ்தானத்திற்கு பாத்தியப்பட்ட பண்டைய காலத்து ஆவணங்கள் இருந்த கட்டடம் (ரிக்கார்டு ஆபிஸ் பில்டிங்) திடீரென தீப்பிடித்து எரிந்து முற்றிலும் சேதமடைந்தது.
எட்டயபுரம் இருபதாவது பட்டம் ஜெகவீரராம கெக்சில் எட்டப்ப நாயக்கர் குமாரர் ஜெகவீரராமகுமார் எட்டப்பநாயக்கர் கொல்லம் 742 ம் ஆண்டு அதாவது கி.பி.1567ம் ஆண்டு தை மாதம் எட்டயபுரம் நகரம் உருவாக்கப்பட்டதாகும். எட்டயபுரம் அரண்மனை வளாகத்திற்குள் அரண்மனை கட்டடம் உட்பட பல்வேறு கட்டடங்கள் உள்ளன. இதில் அரண்மனைக்கு அருகில் ரிக்கார்டு ஆபிஸ் பில்டிங் உள்ளது. இந்த கட்டடத்தில் பண்டைய காலத்து ஆவணங்கள் வைக்கப்பட்டிருந்தது. இந்த கட்டடத்தில் ஏற்பட்ட தீவிபத்தால் ஆவணங்கள் எரிந்து சாம்பலானது.
கட்டடம் எரிந்து இடிந்து விழுந்து முற்றிலும் சேதமடைந்தது. சுமார் 400 ஆண்டுகளுக்கு முன் கல், செங்கல், பதனீர் கலவையுடன் கூடிய சுண்ணாம்பு, கடுக்காய் கலந்து கட்டப்பட்ட கட்டடம். பழமையான ரேக்குகள், விட்டங்கள், உத்திரங்கள் ஆகியவை விலை உயர்ந்த மரங்களினால் ஆனது.
சேதமதிப்பு உடனடியாக கணக்கிட முடியவில்லை. தகவலறிந்து கோவில்பட்டி தீயணைக்கும் படை நிலைய அதிகாரி பொறுப்பு ராமசாமி தலைமையில் தீயணைக்கும் படை வீரர்கள் சுமார் 1 1/2 மணி நேரம் போராடி தீயை அணைத்தனர்.
நன்றி.தினமலர்.26.05.2011

Sunday, May 22, 2011

சின்னக்குத்தூசி... கலைஞரின் தீராக்காதலன்....

திராவிட இயக்கதின் ஆற்றல் மிக்க சிந்தனையாளர், நாத்திகச் செம்மல் பத்திரிக்கை ஜாம்பவான் எழுத்துலகின் முடிசூடா மன்னராகத் திகழ்ந்த திரு.சின்னக்குத்தூசி(எ) இரா.தியாரகராஜன் அவர்கள் 22.5.2011 அன்று காலை 7.50 மணிக்கு சென்னையில் மாரடைப்பால் காலமானார். அவருக்கு வயது 77.

கடந்த ஓராண்டு காலமாக சென்னை பில்ராத் தனியார் மருத்துவமனையில் உயர்சிகிச்சைப் பெற்றுக்கொண்டிருந்த நிலையிலும், அனல் பறக்கும் அரசியல் கட்டுரைகளை தொடர்ந்து எழுதி வந்தார். தன் உடல்நிலை மிகவும் நலிவுற்ற நிலையில் இருந்தபோதிலும் தன்னை சந்தித்திட வருகை தந்த பத்திரிகை நண்பர்கள், அரசியல் நண்பர்களிடம் நாட்டுநிலைமை, அரசியல் நிலைமை, பற்றியெல்லாம் மணிக்கணக்கில் அழுத்தம் திருத்தமாக விவாதித்து வந்தார். என்பது குறிப்பிடத்தக்கது.

(முதல்வர்) கலைஞர் அவர்கள் தனது அரசாங்க நிகழ்வுகள், சட்டமன்ற நிகழ்வுகள், தேர்தல் நிகழ்வுகள் என்று பல்வேறு அயராதப் பணிகளுக்கு மத்தியிலும பில்ராத் மருத்துவமனைக்கு பலமுறை நேரில் வருகைதந்து திரு. குத்தூசி அவர்களுடன் கலந்துரையாடி அவரது உடல்நலனில் அக்கறை காட்டியதன் மூலம் அவர்கள் இருவரிடையே இருந்த நட்பு எத்தகைய வலிமை மிக்கது என்பதை உணரமுடியும்.

இதேபோல் (துணை முதல்வர்) மு.க.ஸ்டாலின் அவர்களும் தமிழகம் முழுவதும் சுற்றிச் சுழன்று ஆட்சிப்பணி, கட்சிப்பணிகளில் ஈடுபட்டிருந்த நிலையிலும் பல முறை நேரில் வருகைதந்து சின்னக்குத்தூசியின் உடல்நலனை அக்கறையுடன் விசாரித்தார். அதுமட்டுமின்றி, அமைச்சர்கள், தி.மு.கழக முன்னணியினரிடம் குத்தூசியின் எழுத்துப்பணியை பாராட்டிப் புகழ்ந்து புளகாங்கிதம் கொள்வார்.

திராவிடர் கழகத் தலைவர் கி.வீரமணி மற்றும் தி.மு.கழக மத்திய-மாநில அமைச்சர்கள் கழக முன்னணியினர் தொடர்ந்து மருத்துவமனைக்கு வருகை தந்து சின்னக்குத்தூசியின் உடல் நலத்தில் அக்கறை காட்டினர்.

நக்கீரன் குடும்பத்தினர், சின்னக்குத்தூசியைப் பிதாமகனாகப் தந்தெடுத்துக்கொண்டதுடன், திரு.நக்கீரன் கோபால் அவர்கள் இரவு பகல் பார்க்காமல் கண்துஞ்சாமல்-ஒரு தந்தைககு மகன் என்னென்ன கடமைகளைச் செய்வாரோ அத்தனை கடமைகளையும் கடந்த 15 ஆண்டுகளாக செய்து வந்ததோடு, கடந்த ஓராண்டு காலம் பில்ராத் மருத்துவமனையில் அரண்மனை வைத்தியத்தை திரு.சின்னக்குத்தூசிக்கு வழங்கினார்.

மறைந்த திரு.சின்னக்குத்தூசியின் உடல் இராயப்பேட்டை ஜானிஜான்கான் தெருவில் உள்ள நக்கீரன் பத்திரிகை அலுவலகத்தில் பொதுமக்கள் பார்வைக்காக வைக்கப்பட்டுள்ளது. தி.மு.க. கழகத் தலைவர் கலைஞர், பொருளாளர் மு.க.ஸ்டாலின் உள்பட அரசியல் தலைவர்கள், பொதுமக்கள் குடும்பம் குடும்பமாக வந்து மலரஞ்சலி செலுத்திய வண்ணமுள்ளனர். இன்று (மே 22) மாலை 4 மணியளவில் பெசன்ட் நகர் மின்மயானத்தில் அன்னாரது உடல் தகனம் செய்யப்படுகிறது.

மறைந்த திரு.சின்னக்குத்தசியின் வாழ்க்கை நிகழ்வுகள் வருமாறு

சின்னக்குத்தூசி என்றழைக்கப்படும் இரா.தியாகராஜன் அவர்கள் 15.06.1934ல் திருவாரூரில் பிறந்தார். தந்தை ராமநாதன். தாயார் கமலா அம்மையார். திருவாரூர் கழக உயர்நிலைப் பள்ளியில் கல்வி பயின்ற சின்னக்குத்தூசி, பள்ளியில் படிக்கும்போதே திருவாரூர் நகர திராவிட இயக்க முன்னோடிகளான சிங்கராயர், முத்துக்கிருஷ்ணன், வி.எஸ்.பி. யாகூப், 'தண்டவாளம்' ரங்கராஜன் ஆகியோருடன் ஏற்பட்ட தொடர்பால் திராவிட இயக்க கொள்கைகளின்பால் கவரப்பட்டார்.

பள்ளிப்படிப்பு முடிந்தபின், பயிற்சி பெறாத ஆசிரியராக பணியாற்றிய சின்னக்குத்தூரி (எ) இரா.தியாகராஜன், ஆகிரியர் பயிற்சி பெறுவதற்காக, திருவாரூர் நகர மன்றத் தலைவராக இருந்த சாம்பசிவம் அவர்களிடம் பரிந்துரைக் கடிதம் பெற்று தந்தை பெரியாரை சந்தித்தார். பெரியாரின் ஆசிரியர் பயிற்சி நிறுவனத்தில் சிறப்பு அனுமதியின் அடிப்படையில் சேர்க்கப்பட்டு, ஆசிரியர் பயிற்சி பெற்றார். அதன்பின், பல்வேறு பள்ளிகளில் ஆசிரியராகப் பணியாற்றினார். இவற்றில் குறிப்பிடத்தக்கது, குன்றக்குடி அடிகளார் அவர்களின் நிர்வாகத்தில் செயல்பட்ட குன்றக்குடி உயர்நிலைப்பள்ளியாகும். இப்பள்ளியில் பணியாற்றும்போது, குன்றக்குடி அடிகளாரின் அன்பைப் பெற்று, அவரிடம் நெருக்கமாக செயலாற்றினார்.

குன்றக்குடியில் பணியாற்றியகாலத்தில், தமிழ்த் தேசியக் கட்சியின் நிறுவனர் ஈ.வி.கி.சம்பத் அவர்களின் அழைப்பை ஏற்று, ஆசிரியர் பணியைத் துறந்துவிட்டு சென்னையில் நடந்த இந்தி எதிர்ப்பு போரில் பங்கேற்று சிறை சென்றார்.

திருவாரூரிலிருந்து வெளியான மாதவி வார இதழின் பொறுப்பாசிரியராகப் பணியாற்றிய சின்னக்குத்தூசி, பின்னர் தமிழ்த் தேசியக் கட்சியின் அதிகாரப் பூர்வ ஏடான தமிழ்ச் செய்தி வார இதழ், நாளிதழ் ஆகியவற்றின் பொறுப்பாசிரியராகவும் பணியாற்றினார். தமிழ்த் தேசியக் கட்சி, காங்கிரசில் இணைந்தபிறகு, பெருந்தலைவர் காமராஜர் அவர்கள் நடத்திய 'நவசக்தி'யில் தலையங்க ஆசிரியராக சிறிது காலம் பொறுப்பேற்றிருந்தார்.

நாத்திகம், அலைஓசை, எதிரொலி, முரசொலி உள்ளிட்ட நாளேடுகளிலும் நக்கீரன், ஜூனியர் விகடன் உள்ளிட்ட வாரமிருமுறை இதழ்களிலும் மற்றும் பல இதழ்கள், சிற்றிதழ்கள் ஆகியவற்றிலும் ஏராளமான அரசியல் விமர்சனக் கட்டுரைகளை எழுதிக் குவித்துள்ளார். வலுவான வாதங்கள், அசைக்க முடியாத ஆதாரங்கள், மறுக்க இயலாத புள்ளிவிவரங்கள், வரலாற்று நிகழ்வுகள் இவற்றை அடிப்படையாகக் கொண்டு எழுதப்படும் இவரது கட்டுரைகள் தமிழக அரசியல் களத்தில் பலரது கவனிப்பையும் பெற்றுவருகின்றன.

இவரது கட்டுரைகள் 'புதையல்', 'கருவூலம்', 'களஞ்சியம்', 'சுரங்கம்', 'பெட்டகம்', 'எத்தனை மனிதர்கள்', 'சங்கொலி', 'முத்தாரம்' 'வைரமாலை' உள்ளிட்ட பல தலைப்புகளில் நூல்களாக வெளிவந்துள்ளன. அமரர் ஜீவாவின் பொறுப்பில் வெளியான 'தாமரை' இதழிலும் இவரது சிறுகதைகள் வெளியாகியுள்ளன. நாராண துரைக்கண்ணன் அவர்கள் நடத்திய பிரசண்ட விகடன் இதழில் தொடர்கதை எழுதியுள்ளார். கலைஞர் அவர்களின் அன்பைப் பெற்ற சின்னக்குத்தூசி அவர்கள் முரசொலியில் தொடர்ந்து கட்டுரைகள் எழுதிவந்தார்.

சின்னக்குத்தூசி என்ற புனைபெயரில் இவர் பரவலாக அறியப்பட்டாலும் கொக்கிரகுளம் சுல்தான் முகமது, காமராஜ் நகர் ஜான் ஆசிர்வாதம், தெரிந்தார்க்கினியன், ஆர்.ஓ.மஜாட்டோ, திட்டக்குடி அனீஃப் ஆகிய புனைப் பெயரிகளிலும் பல அரசியல் விமர்சனக் கட்டுரைகளை எழுதியுள்ளார்.

நடமாடும் திராவிட இயக்க களஞ்சியம் எனும்படி தமிழகத்தின் 60 ஆண்டுகால அரசியல் விவரங்களை விரல் நுனியில் வைத்திருக்கும் சின்னக்குத்தூசி அவர்கள் இந்திய அரசியல் குறித்தும் ஆழ்ந்த அறிவனுபவம் மிக்கவர். பொதுவாழ்க்கை - எழுத்துப்பணி இவற்றிற்றகாக திருமணம் செய்துக்கொள்ளாமல் வாழ்ந்து வந்த சின்னக்குத்தூசி அவர்கள் சென்னை திருவல்லிக்கேணி எண்.13 வல்லப அக்கிரஹாரம் தெருவில் தங்கியிருந்த சிறிய அறை, இன்றைய பத்திரிகையாளர்களின் வேடந்தாங்கலாக அமைந்திருந்தது. மனிதநேயம், பகத்தறிவு, சுயமரியாதை ஆகியவற்றை இலட்சியங்களாகக் கொண்டு திராவிட இயக்க நெறிகளின்படி வாழ்ந்து வந்தவர் திரு.சின்னக்குத்தூசி (எ) இரா.தியாகராஜன் அவர்கள்.

நன்றி:நக்கீரன்

Wednesday, December 15, 2010

திராவிட சினிமா நூல் குறித்த யமுனா ராஜேந்திரனின் அவதூறுகள்...

திராவிட சினிமா என்ற திராவிட இயக்க திரை ஆவணத்தை நானும் வீ.எம்.எஸ்.சுபகுணராஜ்னும் தொகுத்து கடந்த 2009 அக்டோபர் மாதம் கயல் கவின் பதிப்பகம் வெளியிடாக வெளியிட்டிருந்தோம். இந்த நூலை வெளியிடுவதற்கான நோக்கத்தை ”திராவிட இயக்கத்துக்கும் சினிமாவுக்கும் உள்ள தொடர்பை ஆவணப்படுத்த வேண்டும் என்ற எண்ணம் எழுவதற்கு தியோடர் பாஸ்கரனின் சித்திரம் பேசுதடி தொகுப்பு காரணமாக அமைந்தது.திராவிட இயக்கத்தின் திரைப்பட முன்னெடுப்புக்களைத் திட்டமிட்டு மறைத்த அடாத செயலை அறிவுப்பூர்வமாக முறியடிக்கவே இந்நூலைத் தொகுக்க முனைந்தோம்.” என குறிப்பிட்டிருந்தோம். திராவிட இயக்க முன்னோடி ஏ.வி.பி.ஆசைதம்பி நடத்திய திரைப்பட வார இதழின் பெயரான திராவிட சினிமா என்ற பெயரையே இந்த நூலின் தலைப்பாக தேர்ந்தெடுத்தோம். இந் நூலில் செல்லூலாய்டும் திராவிட இயக்கமும் ; சில குறிப்புக்கள் என்ற தலைப்பில் நானும், பேசப்படாத சித்திரங்கள் என்ற தலைப்பில் வீ.எம்.எஸ்.சுபகுணராஜனும் பதிப்புரைகள் எழுதியிருந்தோம். மாரக்சிய விமர்சகர் யமுனா ராஜேந்திரன் இந்த நூலை ” புதியப் பார்ப்பன விமரசனக்கண்ணாடி” கொண்டு அணுகியுள்ளார். இந்த அவதூறு விமர்சனம் டிசம்பர் 2010 உயிர்மை இதழில் வெளிவந்துள்ளது.

திராவிட இயக்கத்தின் திரை சாதனையை அறிய விரும்புவோர் அவசியம் படிக்க வேண்டிய தோழர் மதிமாறனின் பதிவு

http://mathimaran.wordpress.com/2010/01/04/artical-268/

Sunday, December 12, 2010

அயோத்திதாசரும் சிங்காரவேலரும் நவீன பௌத்த மறுமலர்ச்சி இயக்கம் வெளிவராத விவாதங்கள்

சிங்காரவேலருக்கும் (1860-1946 அயோத்திதாசருக்கும் (1845-1914) புத்த மத விவாதம் முறையாக ஸ்டாலின் ராஜங்கத்தால் தொகுக்கப்பட்டு
அயோத்திதாசரும் சிங்காரவேலரும் நவீன பௌத்த மறுமலர்ச்சி இயக்கம் வெளிவராத விவாதங்கள் என்ற தலைப்பில் சென்னையில் செயல்படும் கயல் கவின் பதிப்பகம் அழகாக அச்சிட்டு வெளியிட்டுள்ளது.தீராத்தியாகம் சாதி மறுப்பு நோக்கிலான் வரலாறு- அரசியல்-பண்பாடு என்ற நூலையும் கயல் கவின் பதிப்பகம் வெளியிட்டுள்ளது.

தொடர்புக்கு- 9445281885

Wednesday, December 1, 2010

இலங்கை திராவிட முன்னேற்றக் கழக வரலாறு
இலங்கையில் திராவிடர் இயக்கம் தொடங்கப்பட்ட காலம் முதல் 1963ஆம் ஆண்டு சிறி லங்லா சுதந்திர கட்சியால் தடைசெய்யப்பட்டு பிறகு ஏற்பட்ட மாற்றங்கள் குறித்த பல்வேறு வரலாற்று செய்திகள் அடங்கிய நூலை சென்னையில் உள்ள நாலந்தா பதிப்பகம் விரைவில் வெளீயிட உள்ளது.